Die ideologiese en filosofiese onderbou van ons minister van finansies, Tito Mboweni, se aangepaste begrotingsrede wat hy gelewer het, bied veel stof tot nadenke.
Hy haal Matteus 7 verse 13 en 14 aan wat soos volg lui: “Gaan deur die nou poort, want breed is die poort en breed is die pad wat tot ondergang lei, en baie betree dit. Maar die poort wat klein en smal is, dit lei tot die pad van lewe, en net ’n paar vind dit.” Hy is dan van mening dat ons land met ’n keuse tussen hierdie twee poorte gekonfronteer word. Die smal of die breë weg.
Terwyl die breë weg die afgelope dekade veral groot aanklank by leidende politici gevind het, het dit tot ongekende ekonomiese verval gelei. Dit is die taak nou van Mboweni om die ekonomie op die herstelpad te plaas. Daarom sy beroep op almal om van die breë weg af te sien en hul tot die smal pad te wend. Dit is duidelik dat hy en dr Zweli Mkhize groot vertrouelinge van president Ramaphosa is. Albei verstaan hul opdragte baie duidelik. Die een is verantwoordelik om die ekonomie te red, terwyl die ander een verantwoordelik is vir die land se gesondheid.
Die president is verantwoordelik vir die oorhoofse politieke bestuur van die land. Tot dusver het hy goed gedoen. Veral wat die bestuur van uiteenlopende ideologiese vertrekpunte in die ANC aanbetref.
Voor die uitbreek van die COVID-19-pandemie en die inwerkingstelling van die Nasionale Rampbestuurswet, het die verdeeldheid binne die ANC dikwels na die openbare domein oorgespoel. ’n Algehele gebrek aan partydissipline het geheers. Die COVID-19-pandemie het egter vir Ramaphosa ’n geleentheid soos min gebied om beheer oor die ANC te verkry en sy magsbasis binne die party te versterk.
Dat hy van tyd tot tyd sy eie ideologiese standpunte ondergeskik moes stel aan sy minister van koöperatiewe regering en tradisionele sake, Nkosazana Dlamini-Zuma se voorkeure, is duidelik ’n teer saak vir hom. Maar hy het geen keuse as om haar te akkommodeer nie. Sy bly sy gedugste politieke teenstaander en is daarop uit om hom uit die kussings te lig om self president van die land te word.
Sy is ’n swaargewig politikus en is bekend met die geo-politieke omgewing. Sy word ook deur ’n beduidende groepering binne die ANC en in die kabinet ondersteun.
LEES DIE VOLLE BERIG OP DIE SKAKEL BO.
